Kinasuhan ng Ombudsman si Senator Jinggoy Estrada ng plunder at dalawang bilang ng graft kaugnay sa umano’y P573 milyong kickbacks mula sa mga flood control projects.Ito na ang ikatlong beses sa loob ng 25 taon na nahaharap si Estrada sa kasong plunder, na isasampa sa Sandiganbayan.Unang nasangkot si Estrada sa plunder case noong 2001 kasama ang kanyang ama na si dating Pangulong Joseph Estrada.

Kinasuhan sila dahil sa iba’t ibang alegasyon, kabilang ang pagtanggap ng proteksiyon na pera mula sa jueteng, maling paggamit ng tobacco excise tax, at umano’y kickbacks mula sa stock transactions.Gayunman, napawalang-sala si Jinggoy Estrada dahil sa kakulangan ng ebidensiya, habang nahatulan ang kanyang ama.

Noong 2014, muli siyang kinasuhan ng plunder at iba pang kaso kaugnay ng umano’y maling paggamit ng kanyang Priority Development Assistance Fund (PDAF) na nagkakahalaga ng P183 milyon.

Noong Enero 2024, pinawalang-sala siya sa plunder case matapos sabihin ng Sandiganbayan na wala siyang kaalaman sa scheme na pinangunahan ni Janet Napoles.Nahatulan man siya sa ilang bribery charges, kalaunan ay na-reverse ang mga ito noong Agosto 2024 dahil sa kakulangan ng sapat na ebidensiya.Sa kasalukuyan, may natitira pang 11 graft cases laban kay Estrada na pending pa rin sa Sandiganbayan Fifth Division.Ang bagong kaso ay nagdadagdag sa mahaba niyang legal na laban at muling naglalagay sa kanya sa sentro ng isyu ng korapsyon sa pamahalaan.