Isang panukalang batas na inihain ni Senator Erwin Tulfo ang naglalayong gawing libre ang board exams, bar exams, at civil service examinations para sa mga kwalipikadong indigent na Pilipino.Kilala bilang Senate Bill No.

2035 o ang “Free Professional Examinations Act,” layunin nitong mabawasan ang financial burden ng mga graduate na gustong makakuha ng professional license ngunit nahihirapan dahil sa mataas na exam fees.

Ayon kay Tulfo, maraming Pilipino ang nakakapagtapos ng pag-aaral ngunit hindi naipagpapatuloy ang kanilang propesyon dahil sa kakulangan ng pondo para sa licensure exams.Dahil dito, napipilitan silang magtrabaho agad kahit hindi tugma sa kanilang natapos, na nagreresulta sa underemployment.

Sa ilalim ng panukala, sasagutin ng gobyerno ang bayarin para sa mga exam na pinangangasiwaan ng Professional Regulation Commission (PRC), Civil Service Commission (CSC), at maging ang Bar examinations.

Upang makapag-avail ng libreng pagsusulit, kinakailangan ng aplikante na magpakita ng certificate of indigency mula sa Department of Social Welfare and Development (DSWD).Nakasaad din sa panukala na maaaring makakuha ng benepisyo ang isang kwalipikadong indibidwal isang beses kada taon.Sa kasalukuyan, umaabot sa P900 hanggang P1,300 ang bayad sa PRC licensure exams, habang nasa P500 naman ang civil service exam.Para sa Bar exams, umaabot sa P12,800 ang bayad, na itinuturing na malaking halaga para sa maraming Pilipino.

Kung maisasabatas, inaasahang mas maraming graduates ang magkakaroon ng oportunidad na makakuha ng lisensya at makapasok sa kanilang napiling propesyon.Layunin din ng panukala na makatulong sa workforce development ng bansa sa pamamagitan ng pagbibigay ng pantay na pagkakataon sa mga kapos sa buhay.