Ang ikalawang araw ng pre-trial proceedings sa impeachment case laban kay Vice President Sara Duterte ay nakatuon sa pagproseso ng napakaraming documentary evidence, lalo na para sa unang artikulo ng impeachment na may kinalaman sa umano’y maling paggamit ng confidential funds.

Ayon sa House prosecution panel, sa kampo ng depensa, at sa Senate Clerk of Court, may hindi bababa sa 4,000 dokumentong ebidensya na may kaugnayan sa umano’y paggamit ni Duterte ng P612.5 milyon na confidential funds habang pinamumunuan niya ang Office of the Vice President at ang Department of Education.Dahil sa dami ng mga dokumento, inaasahang magtatagal ang pre-trial hanggang sa huling nakatakdang araw nito sa Hunyo 25.

Sa yugtong ito ng impeachment process, pinag-uusapan ng magkabilang panig ang pagmamarka ng ebidensya, listahan ng mga testigo, iskedyul ng paglilitis, mga napagkakasunduang katotohanan, at ang pagkakasunod-sunod ng presentasyon ng mga ebidensya.

Nauna nang natapos ang pagmamarka ng ebidensya para sa ikatlo at ikaapat na artikulo ng impeachment, na tumatalakay sa umano’y panunuhol sa mga opisyal ng Department of Education at sa mga alegasyon ng grave threats laban kay Pangulong Ferdinand Marcos Jr.at sa kanyang pamilya.

Iminungkahi rin ng House prosecution ang pagkakasunod-sunod ng pagtalakay sa mga artikulo ng impeachment, na magsisimula sa alegadong assassination plot, susundan ng confidential funds issue, bribery allegations, at usapin ng SALN at umano’y unexplained wealth.Samantala, humihiling ang prosecution ng 62 trial days, habang 30 araw naman ang nais ng depensa.Iginiit din ng prosecution na dapat mas malinaw na tukuyin ng depensa ang layunin ng bawat testigo.

Pinabulaanan din ni lead prosecutor Jinky Luistro ang mga pahayag sa social media na umano’y lamang ang depensa sa unang araw ng pre-trial, at hinikayat ang publiko na maging maingat laban sa maling impormasyon.